ياعالم بحال البنات يارب

بصراحة شديدة جدا ومن غير تحيز
بنات اليومين دول معظمهم مش كلهم عاوزين الحرق
وعجبنى شعر جامد جدا للشاعرة ايمان بكرى بتقول فيه

يابنت بلدي عيب

لما اللجام هيسيب

يسترخصوكي الناس

في بنطلون مزنوق

وبلوزه شبر لفوق

ولا حتى فـ الجمباز

عريتي تحت وفوق

ولا عدش عندك زوق

ولاحتى فيه احساس

لحم الخروف مدبوح

بنجيبه بعد الروح

ما تحصّــل الأنفاس

ولحمتك بالكوم

دكان وطول اليوم

مفتوح لأرخص ناس

يخرب زمنا زمان

كأنه عُمر ما كان

لا لينا اصل ولا اساس

هى تعليقها كان على طريقة لبس البنات بس هى بتبدأ كده فى الاول نقول دى موضة فى اللبس وبعدين بتظهر موضة فى الطبع

لانها وبكل بساطة نتيجة طبيعية

طيب واللى لسه طريقة لبسها زى ماهو بس طورت فى اخلاقها

المعروف عن البنات زمان انهم كانوا تابعين لرغبات اهلهم لكن دلوقتى اهلهم هما اللى تابعين لرغباتهم

زمان كان الاهل بيربوا أولادهم بطريقة كانت بتحافظ عليهم وهى ...........كلنا عارفينها بلاش نقلب فى المواجع

لكن دلوقتى الاهل لازم يبقوا سبور فى كل حاجة وتربيتهم لاولادهم بقت مختلفة ده لو عرفوا يربوهم

المعروف ان التربية مش هى العامل الاساسى علشان الواحد يكون كويس او محترم باختصار مش الشبشب هو اللى لازم يربى

فى اهل ممكن جدا يكون اهل قاسيين جدا على اولادهم بس احيانا بيطلعوا زى اهلهم ماعاوزينهم بس بيكونوا معقدين وغالبا الطريقة دى بتقلب للعكس ومن غير الاهل مايعرفوا وساعات بيعرفوا لما بيلاقوا لجام أولادهم بقى يسيب من ايديهم والفئة التانية دى بيبقوا برده معقدين

لكن الاكيد ان الواحد لما بيلاقى ثقة اهله فيه بيصعب عليه يخيب املهم فيه ويهز ثقتهم دى فبيضطر يحترم نفسه احتراما ليهم

وطول ماانت قدام اهلك لازم تبان قدامهم بشكل كويس ولما تبعد عنهم المفروض تكون افضل لانك بتمثلهم

لان اول حاجة بتتقال لاى حد مش كويس واللى كلنا عارفينها (الله يلعن تربيته او تربيتها)(لامؤاخذة يعنى)

بس الموقف اللى حصل قدامى لايمكن لاى حد تخيله

هى بنت تمام جدا تبان فى قمة الادب والاخلاق هى والشلة اللى معاها لكن لما اتصاحبوا على بعض ده من وجهة نظرهم

كل واحدة فيهم كان فيها شوية من اياهم فبقوا شلة ونعم الفساد لكن هى كانت البيج بورص بتاعهم

اهلها عارفينها بالشيخة سلمى وده اسمها اللى اختارته ليها على الايميل بتاعها

والاخت بقى مفيش واد فيكى يادى المحافظة مااتعرفش عليها( قطر رايح جاى فيه- اصحاب ايميلات ماشى -موبايلات ميضرش-مواصلات داخلية معلش )

وكانت ماشية بمبدأ غريب جدا( المليان يكب على الفاضى )لأ ده مبدأ فودافون

مبدأها هيا المليان يمسح الفاضى ارقام وايميلات وكله يهون علشان الحب

أحيانا كنت بلتمسلها العذر لانها من اسرة متواضعة بس مش كل واحد ظروفه مش مساعداه يعمل الغلط ويتحجج بالظروف والا المصايب كده هاتكتر هى كان كل املها انها تلاقى الانسان المناسب اللى يحقق ليها كل احلامها وطموحاتها وتعوض اللى اتحرمت منه

لكن مفيش واحد محترم بيرتبط بانسانه عارف عنها الظروف دى لانها اكيد مش موضع ثقة

بس الله المستعان

فاشل فاشل ياولدى

بم ان والحمد لله فى شباب كتير قوى فاشل فى كل حاجة هو بصراحة لسه معملش حاجة يفشل فيها بس ماشاء الله دايما كل مايبقى عنده طموح فى حاجة بيتنبأ لها بالفشل قبل مايعملها مش لاسمح الله فاقد الثقة فى نفسه او انه ممكن يعمل الحاجة دى وينجح فيها بس هى ممكن يكون فضلة خيره ثقة زايدة فى الفشل بيثق فيه ثقة عمياء وبيعتبره سنده وصديقه الصدوق الحمد لله يعنى عمره مايتخلى عنه ونعم الصداقة انا مشفتش حد مخلص كده بصراحة مش الفشل اللى مش راضى يسيبك انت اللى مش عاوز تسيبه. ممكن يكون مش لازم نفكر بالطريقة دى بس كل واحد لو دور جواه هيلاقى طاقات مكبوتة ولازم يخرجها فى حاجة مفيدة ولازم يشغل عقله قبل ما عقله يفوت والبرج اللى فاضله يطير واعرف ناس دماغها عامل زى الكمبيوتر بيفكروا فى اكتر من حاجة ودماغهم مبتفصلش وعندهم طموحات كتيرة بس ايه المشكلة متجرب حظك وعلى الاقل يكفيك شرف المحاولة ترضى بيه نفسك والأفضل حدد انت عاوز ايه بالظبط لان فى ناس تابعة لطموح اهلها وده مش غلط بس متقولش انا هحقق طموح اهلى فيا بانى اكون دكتور او مهندس وانت نفسك تكون حاجة تانية بس من حبك الزايد ليهم لغيت طموحك وتقول لازم استرجل كده واحقق لهم طموحهم فيا لانهم يستاهلوا طبعا انك تموت علشانهم بس هما بقى ضحكوا عليك ومحددوش هما عاوزينك تطلع دكتور ولا مهندس وطبعا انت نسيت تسألهم قبل الامتحان تدخلهم طب ولا هندسة فبالتالى ولادخلت هنا ولا هنا لانك كالعادة مكنتش مركز ومحدد حاجة واحدة وماشى كده بالبركة هى كده مش بركة بصراحة كده تبقى لعنة

اكيد

كلنا بنحب مصر قوى
بم اننا فى بلد ديمقراطى عظيم زى بلدنا الجميلة حبيت اتحلى بالحرية واعبرعن رايي واتمنى الاقى اللى يشاركونى وحابين يعبروا عن رايهم مش شرط فى السياسة لاننا ملناش دعوة باللى منعرفش فيه بس ممكن نحاول نفهم اى حاجة فى اى حاجة بدل ماحنا على طول كده حافظين ومش فاهمين قال ايه مش فاضيين ورانا ايه الله اعلم

فينك يافوزى

اقرارا بدور الاخ فوزى فى حل مشكلة الانابيب فى اغنيته الشهيرة والنبى يافوزى انبوبة يافوزى فى ازمة فى الانابيب ولكن فوزى ده كان قلبه حنين وكانت حبيبته مش بتحمل هم ازمة الانابيب لكن دلوقتى فى ظل الازمة دى مفيش ولا واحدة عارفة تلاقى فوزى فااظطرت أسفا تنزل بنفسها تشوف اخرتها وتحايل فى فوزى ومرسى وعباس ومتولى مفيش فايدة برضه لافوزى طيب القلب عاوز ييجى يجيب الانابيب ولا الباقى حنونى القلب زيه طيب وبعدين فوزى هيتاخر كتير على مايجيب الانابيب ولو مجاش ممكن نرجع تانى لايام جدتى الله يرحمها ونستخدم الطرق البدائية فى الطبخ والذى منه بس البنات اليومين دول مستحيل يبقوا فى قوة صبر وتحمل جدتى بالرغم من انى مشفتهاش بس اسمع عنها وعن الفرن البلدى والطبخ على الفحم ولكن احنا ممكن ييجى علينا وقت ونستورد الفحم من الجزائر وبعدين زى الازمة دى ديوننا تكتر عليهم فيمنعوا تصديره لينا او منتخبنا يغلب منتخبهم فى اى ماتش كورة فيعملوا فينا كده تانى بس الحل المؤقت دلوقتى اننا نطالب منتخبنا القومى بانه ميغلبش الجزائريين تانى واى لعيب اخد اى مكافأة مادية او معنوية لأ لو معنوية يخليهاله لكن لو مادية يدينى نصها ويدى الجزائر نصها او يديهالى كلها وأنا هتصرف واتفاوض معاهم اما بالنسبة للأخ جدو علشان محدش يفهمنى صح ويفتكر انى بكلم جدى ولا حاجة اقصد جدو الشاب فيجيب الشقة اللى اخدها ويعمل معروف انا مش عارفة اعمل اكل من حوالى ساعة لكن لو كلامهم صح والكورة ملهاش دعوة يبقى الكلام التانى ده صحيح وبطالب اسرائيل شخصيا ترجع اللى خدته مش كل حاجة بتتاخد عافية احنا بالصلاة على النبى حقنا فى غازنا ميضعش ولو مصرة يعنى انها تاخد الغاز مننا انا مش بخاف من حد بس تاخده يمكن هى محتاجاه اكتر مننا واحنا عندنا قلب برضه بس لازم تزود المعلوم مش احنا نستوردلها الغاز ب3 مليار دولار وهى تاخده ب164 مليون جنيه لأ والغريب انها بتستورد مننا نفس الكمية اللى احنا بنستوردها لكن بغض النظر عن اللى ملناش فيه واللى قالقنى دلوقتى هى برضه هتستورد مننا الفحم و المرة دى بقى لازم تزود المعلوم شوية أو فوزى هيشوف شغله وممكن اخواتنا وحبايبنا فى فلسطين يشوفوا شغلهم برضه احنا العرب حقنا ميضيعش حتى لو فى استثناءات بس برضه حقنا مش بيضيع ولكن كل اللى اقدر اقوله (لنا الله)